Bes Tu Bimeş

Nûjiyan Erhan

Di meşa te de veşartiye azadiya welatê min. Di meşa te de veşartiye pêşeroja zarokên çavxezal ya Kurdistana min. Meşa te temînata siberoja min e. Meşa te hêviya jiyana min e. Ti kelem nikare pêşiya te bigire heya tu bimeşî.

Evîna welatê dilşewat, bêdengiya te bizotê agir e di nav hêlîna kevoka min de. Kevoka min hesreta sewta te ye. Dengê kenê te dibe fîşekên çeka min ya ku li hember neyaran hebîba min e. Di xendeya te de şîn dibe dara diroka min. Pelên wê stareya gelê min e. Di siya wê de birîna min cebar dibe. Qet raneweste, destê te dermana hemû êşan a.

Di destên te de tê hûnandin rojên ronak. Derbas dikî pira di navbera ronî û tariyê de û dibî muma şevên tarî ya welatên xerîbiyê. Şewqa te li ser deryayên min diçiruse. Di şînahiya wê de kuraniya evîna min dixuye. Di sûlavên sevdayên te de tên şuştin azara hezar salan. Pêl bi pêl belav dibe strana hezkirina te li dorhêla cîhanê. Gamzeyên te de kom dibe kedera min. Bi te re dert namîne li ser ruyê erdê.

Tu, keça agir û rojê!

Bizane bi te re dikene zaroktiya min. Heger tu bimeşî wê di kolanên Amedê de lîstokên bi qalkê zebeşan dihatin kirin zindî bibin. Li ser sûrên wê dîrok vê carê rastiyan binivîsînê. Berxwedana te bê kolandin li ser dîwaran. Û ti kes sêwî namîne li welatê me. Kiryarên kuştinên kuçeyên tarî derbikevin. Hemû nediyarbûnên veşartî ji holê rabin. Lê bes tu bimeşe…

Tenê tu bimeşe,

Ewê belav bibe hemû ewrên min

Tenê tu bimeşe

Ronî bibe hemû şevên min

Bes tu bimeşe,

Ewê kêm bibe jana kezeba min

Bes tu bimeşe,

Deng bide newaya doza min,

Û bes tu bimeşe,

Ewê şil bibe axên ji tîna re qelişî

Zinarên Govendê dîlana xwe geştir bike

Keviyên çiyayên bilind

Dev ji helandinê berdin.

Germahiya çolan

Ewê Bibe nesima seherên zû.

Heyva çardeh rojî

Bibe rêhevala te

Bes tu bimeşe…